[#東京奧運] 羽毛球混雙銅牌賽，#謝影雪 #鄧俊文 直落兩盤17-21、21-23 不敵日本對手 #東野有紗 #渡邊勇大。喺第二局，香港隊多次領先，迫到三次刁時，最終以21-23敗陣，奪得第四名，創香港羽毛球運動員嘅奧運最佳成績，雖敗猶榮！💪🏻🏸 🇭🇰
謝影雪以網前速度，配合鄧俊文連續攻擊，成功咬住日本對手。不過日本對手實力強橫，渡邊勇大同東野有紗攻擊同防守力超卓，後者曾經瞓喺地下都救返兩板，打斷線亦都可以極速換拍繼續打。兩隊有實力又有毅力，合演一場精彩嘅銅牌賽事。
賽後謝影雪同鄧俊文接受訪問，話表現已經唔錯，不過喺最後關鍵兩分太緊張，唔夠豁出去。阿雪話大家成日話佢帶住鄧俊文，但其實冇俊文係去唔到呢個成績，要多謝佢。俊文亦都多謝阿雪，畀到好多經驗同教到佢喺場上嘅心態控制，對往後成長有好大幫助。
最後一次出戰奧運嘅29歲謝影雪，以「美中不足」形容呢場「最後賽事」，認為自己表現合格，但攞唔到牌始終有啲遺憾。阿雪亦都提到兩位教練 #陳康、#鍾騰福 放棄同屋企人相處時間留港訓練，無論係咩成績，佢哋都係冇放棄相信自己，多謝佢哋九年嚟嘅犧牲，祝佢哋離隊後嘅生活幸福美滿。
阿雪亦都希望可以盡力幫助羽毛球隊嘅發展，希望後生隊員可以盡快接棒。
#開電視黑妹真係評述得好好
Search